فن شارع

الخميس، سبتمبر 20، 2012

فن شارع

بحترم فن الشارع جدا لأنه فن مستقل.. اتنفذ بإيد مش دارسة أو حتي بإيد محترفة لكنها إيد حرة ما بيقيدهاش المقابل المادي ولا رئيس ولا مشرف.. وعقل حر خرجت الفكرة منه من غير خوف أو نفاق أو تملق لشخص غني العمل الفني هيزين جدران بيته، أو رئيس تحرير جريدة عاوز جريدته تبيع. أو صاحب مصنع يستخدم 10% من دماغك والباقي في الزبالة لأنه لو استخدمه هيضطر يدفع فلوس أكتر..

بحترمه لأن الفكرة هي البطل مش الحرفة. دايما بعتبر الناس اللي بتنبهر باللوحات المعقدة في تنفيذها بغض النظر عن الموضوع بإنهم ناس بتحب الإذلال.. عشان تعتبر العمل الفني عمل ناجح لازم تحس قدامه بالتضاؤل والدونية.. زي الإحساس اللي كانت تخلفه المعابد المصرية القديمة وتماثيلها الجبارة في نفوس عامة الشعب البسطاء.. لسة تقييم الفن بالطريقة دي مترسخ في عقلنا الجمعي لغاية النهاردة.

ماينفعش يطلع مسئول كبير ولو كان وزير الشباب نفسه يطلع يقول شغل مش محترف ونعلمهم في مراكز الشباب ويرسموا في مراكز الشباب إلي آخره ده اسمه تدجين ماينفعش حد يملي علي فنان الشارع الطريقة اللي هيشتغل بيها ولا الفكرة اللي حينفذها.. الله؟ يبقي إيه الفرق بينه وبين جرايد النظام بقي؟

سمر الجيار